Vazhdojnë kërkimet për të pagjeturit

Akoma rezultojnë 1775 persona të zhdukur, për fatin e të cilëve nuk dihet

Vushtrri. Për të tretën herë me radhë, kanë nisur gërmimet në Zhvilivodë të Vushtrrisë për të vërtetuar nëse në vendin e quajtur “Maden” ka apo jo mbetje mortore lë luftës së fundit. Kësaj here, ekipet gërmuese thonë ky është hulumtimi i fundit që po bëhet në këtë lokacion, dhe se do të përfundojë brenda një muaji.

Hulumtimet po zhvillohen nga ekipet e EULEX-it për krime të luftës, së bashku me pjesëtarët e Forcës së Sigurisë të Kosovës (FSK), ndërsa lokacioni i dyshuar është në një hapësirë ndërmjet fshatrave Bivolak e Zhilivodë të komunës së Vushtrrisë.

Në vendin e ngjarjes kanë shkuar edhe kryesuesit e komisioneve qeveritare për persona të zhdukur nga Kosova dhe Serbia, të cilët së bashku u zotuan se do të vazhdojnë bashkëpunimin deri në zbardhjen e fatit të të gjithë personave të zhdukur nga lufta e vitit 1999.

Kryesuesi i Komisionit Qeveritar për Persona të Zhdukur, Prenk Gjetaj tha se dyshimet për mbetje mortore në këtë vend nuk kanë përcaktim se cilit nacionalitet mund të i përkasin.

Në Kosovë akoma rezultojnë 1775 persona të zhdukur, për fatin e të cilëve nuk dihet. Një numër i madh të zhdukurve janë gjetur nëpër varrezat masive në Serbi në disa lokacione. Forcat e Millosheviqit i kishin bartur kufomat shqiptare në Serbi në përpjekje për t’i fshehur gjurmët e krimit.

Kryesuesi i Komisioni për të zhdukur nga Serbia, Voljko Odaloviq tha se edhe shteti i tij po punon në zbardhjen e fatit të personave të zhdukur. Ai po ashtu tha se Serbia do t’i tregojnë gjitha dëmshmit, edhe arkivat e ushtrisë për të t’i zbardhur faktin e të pagjeturve.

“Serbia nuk ka arsye që të mos i tregojë këto arkiva. Ato janë të hapura. Mund të ketë problem për disa dosje që janë dërguar në Hagë, por të tjerat që janë në Serbi nuk fshehën”, tha Odaloviq.