Vdes miliarderi zviceran që dha 1 milion për refugjatët e Kosovës!

Haefner kishte dhuruar shumën rekorde, 1 milion franga për refugjatët shqiptarë, në vlugun e pastrimit etnik nga regjimi i Milosheviqit

Walter Haefner, njëri ndër njerëzit më të pasur në Zvicër dhe në Evropë, ka ndërruar jetë para një jave, në moshën 101 vjeçare në Cyrih. Për vdekjen e tij opinioni është njoftuar vetëm sonte.

Përveç si themelues i ndërmarrjes së madhe për importimin e automobilëve Amag, Haefner është bërë i njohur edhe me një akt të tij të shquar human: në vitin 1999, në vlugun e spastrimit etnik që po ushtronte regjimi serb ndaj shqiptarëve të Kosovës, ai kishte dhuruar shumën rekorde që është dhënë ndonjëherë për qëllime humanitare nga kushdo  në Zvicër, plot 1 milion franga për refugjatët e Kosovës!

Këtë shumë Haefner e kishte dhënë në kuadrin e ndihmave që mblidhte organizata humanitare Glückskette e Zvicrës, e cila po kështu kishte realizuar  rekordin e saj, pikërisht duke grumbulluar ndihma për Kosovën dhe kosovarët.

Haefner ka qenë njëri ndër miliarderët më të moshuar në botë, në mos më i moçmi. Ai ka vderku në paqe e qetësi, kanë bërë të ditur nga kompania Amag. Varrimi i tij është kryer në rrethin e tij familjar , ndërsa një ceremoni publike e përshëndetjes nga pionieri i ekonomisë moderne zvicerane do të bëhet më 3 korrik në kishën Fraumïunster të Cyrihut.

I lindur më 13 shtator 1910 në një familje me shumë fëmijë,  Hafner ka hyrë në tregun e automjeteve që në vitin 1929 kur punonte si shitës për Shell-in e pastaj për General Motors-in. Ndërsa në vitin e largët 1944 ai u bë pronar i Amag-ut.  Menjëherë pas Luftës së Dytë Botërore ai kishte filluzar importimin e e xhipave nga SHBA. AMAG bëhet pastaj importues për Zvicër i Chryslerit, Dogde dhe Plymuth.

Sipas Forbes-it Haefner zotëronte një pasuri prej mbi  4 miliardë. Ndonëse miliarder, ai vetë bënte një jetë modeste dhe të tërhequr.