Vdes një ushtar zviceran, me mision në Kosovë

Një ushtar zviceran, i cili ishte në Swisscoy, ka vdekur mbrëmë në Spitalin Universitar të Lozanës. Ai ishte i sëmurë rëndë në Kosovë dhe ishte dërguar më pas në Zvicër.

Për cilën sëmundje është fjala nuk është bërë e njohur nga Ushtria e Zvicrës. Mosha e ushtarit për arsye të mbrojtjes së privatësisë mbetet e panjohur.

Ushtari fillimisht ishte trajtuar një ditë në spitalin ushtarak të forcave të sigurisë së NATO-s në Kosovë (KFOR). Të shtunën e kaluar ai ishte dërguar më pas me Rega në Zvicër dhe ishte trajtuar në Spitalin Universitar të Lozanës, ku edhe vdiq pas disa ditësh.

Kreu i Ushtrisë së Zvicrës ka shprehur keqardhje për vdekjen e pjesëtarit të tyre, duke ngushëlluar familjarët, miqtë dhe shokët e të ndjerit.