Vëllai i mërgimtarit të arrestuar në Serbi kërkon ndihmë nga shteti i Kosovës

Familjarët e Matoshit po kërkojnë nga krerët e shtetit që t’i ndihmojnë për lirimin e tij

Policia e Serbisë më 13 gusht në pikën kufitare tek Dheu i Bardhë kishte arrestuar stomatologun Ibrahim Matoshi, me akuzën se ai ka kryer një krim në shtator të vitit 1999, në fshatin Verbicë e Kmetocit, të komunës së Gjilanit.

Familjarët e Matoshit po kërkojnë nga krerët e shtetit që t’i ndihmojnë për lirimin e tij.

Vëllai i tij, Musli Matoshi, ka bërë thirrje që ta ndihmojnë për lirimin e vëllait të tij, pasi mbrojtja e tij i tejkalon mundësitë familjare, përcjell albinfo.ch.

Ai ka kërkuar reagim dhe mbështetje institucionale, duke thënë se dy shtetet duhet të diskutojnë, pasi kjo është një temë politike dhe të mbrohen edhe qytetarët e tjerë të cilët mund të bëhen pre e akuzave të tilla.

“Dua t’ua bёj me dije se mbrojtja e Ibrahimit i tejkalon mundёsitё tona familjare. Mbrojtja e Ibrahimit kёrkon reagim dhe mbështetje institucionale dhe ёshtё shndërruar nё temё politike qё duhet tё diskutohet nё mes tё dy shteteve me qёllim qё tё mbrohen qytetarёt e tjerё qё mund tё bёhen pre e fabrikimeve tё tilla. Ibrahimi dhe ne si familja sot kemi nevojё pёr ndihmën tuaj institucionale, politike profesionale. Duke i ndihmuar Ibrahimit, ju i ndihmoni institucionet dhe qytetarёt e Kosovёs, qё ёshtё pёrgjegjёsi dhe obligim juaji institucional”, ka shkruar Matoshi.

Po ashtu, thirrje për ndihmë ai i ka bërë edhe përfaqësuesses së BE-së në Kosovë, Natalyia Apostolova, shefit të Misionit të BE-së, Jan Braathu dhe përfaqësuesit të Quint-it në Kosovë.

Ai ka bërë thirrje që ta ndihmojnë krerët e shtetit të Kosovës. Ai ka paralajmëruar se do të organizojë një protestë në Gjilan dhe Prishtinë, në përkrahje dhe mbrojtje të Ibrahimit, së bashku me aktivistë të të drejtave të njeriut.