Vëllezërit Marjakaj shkojnë në SHBA në Kampionatin Botëror të Bodybilldingut Natyror

Dy bodybillderët më të mirë shqiptarë aktualisht, Vëllezërit Valentin dhe Majkëll Marjakaj, të mërkurën udhëtojnë për në Shtetet e Bashkuara të Amerikës, për të marr pjesë në Kampionatin Botëror të Bodybilldingut Natyror (WNBF World Natural Bodybuilding Federation) që më 17 Nëntor zhvillohet në Los Anxhelos, njofton Albinfo.ch.

“Valentini për herë të parë do të garoj në kategorinë Profi, ku në këtë kategori e rëndësishme është kartoni Profi dhe nuk të bëje mosha dhe pesha, ndërsa Majkëlli do të garoj në kategorinë standarde, e ndërkaq në këtë kategori që është gjysmë profesionale, aty ndahen në mosha dhe peshë”, tha Ben Marjakaj, menaxheri i vëllezërve Marjakaj në prononcimin ekskluziv për Albinfo.ch.

Valentini dhe Majkëlli në fund të muajit Tetor u shpallën Kampion dhe Nënkampion të Zvicrës në kategoritë Mr.  Fitness 2018, që organizohet nga Federata Zvicerane të Bodybilldingut Natyror dhe Fitnesit, SNBF (Swiss Natural Bodybuilding and Fitness Federation).

Ata gjithashtu u shpallën edhe Kampion dhe Nënkampion të Gjermanisë, në kategorinë e përgjithshme.

Veçojmë që në të dy garat, Valentin Marjakaj e ka zënë vendin e parë për të gjitha kategoritë.

Nëntorin e vitit të kaluar Valentin Marjakaj, në kampionatin botëror të mbajtur në Boston të SHBA-ve, mori pjesë dhe e fitoi vendin e dytë në Botë në Kategorinë “Men’s Physiqu.

Dy vëllezërit Marjakaj nga Novosella e Gjakovës të cilët jetojnë dhe veprojnë në Uznach të Kanton St. Gallenit në Zvicër, me Fitnes kanë filluar në moshën 19-20 vjeçare, pas përfundimit të karrierës si boksier.