Vërtetohet: Vdekshmëria nga korona, më e larta, që nga Gripi Spanjoll

Në këtë krahasim janë përfshirë pandemitë si dhe vdekjet nga gripi sezonal dhe valët e nxehtësisë në mbi 100 vjet

Në vitin 2020, Zvicra kishte shkallën më të lartë të vdekshmërisë së tepërt mujore që nga gripi spanjoll, pandemia e madhe që kishte përfshirë Evropën në vitin 1918, shkruan srf.ch.

Në këtë krahasim janë përfshirë të gjitha nivelet më të larta të vdekjeve nga gripi sezonal dhe valët e nxehtësisë, gjatë kësaj periudhe rreth 100 vjeçare.

Madje, edhe më shumë se kaq, kulmet mujore të vdekjeve nga koronavirusi, të shënuara në vitin 2020 gjatë pandemisë, pothuajse kanë arritur nivelin e vdekshmërisë të janarit të vitit 1890 kur gripi rus kishte arritur kulmin e tij në Zvicër.

Me këtë rast theksohet se pandemia e vitit 1890 dhe ajo e vitit 1957 patën prekur të gjitha grupmoshat, në mënyrë relativisht të barabartë, ndërsa gjatë gripit spanjoll ishin veçanërisht të rinjtë, ata që vdisnin.

Ndërkaq, pandemia e koronës ka shkaktuar vdekshmëri të tepërt kryesisht tek të moshuarit.

Sipas shifrave të Zyrës Federale të Statistikave, megjithatë kanë vdekur më pak të moshuar  sesa mund të pritej. Kjo ka ndodhur pasi vala e dytë është qetësuar, në vitin 2021.

Ndër të tjera, kjo mund të ketë qenë për faktin se jeta e disa të vdekurve nga Covid 19 ishte shkurtuar vetëm për disa javë ose muaj.

---