Vetëm 35 për qind e zviceranëve duan të vaksinohen

Një pyetje që shumë zviceranë po e bëjnë aktualisht. A duhet të vaksinohem apo jo? Një sondazh përfaqësues tani tregon: shumica është kundër!

Shumica e zviceranëve i shmangen vaksinimit kundër koronës. Në një sondazh përfaqësues, 57 për qind e të pyeturve kanë deklaruar se nuk do të vaksinoheshin ose, “më shumë jo se po”.

Vetëm 35 për qind  e zviceranëve të anketuar janë shprehur se dëshirojnë të vaksinohen sa më shpejt që të jetë e mundur, shrkuan watson.ch.

Sondazhi është kryer nga instituti i hulumtimit të opinionit “Marketagent.com Switzerland”, transmeton albinfo.ch. Për këtë qëllim, janë anketuar një mijë njerëz të moshave 14 – 74 vjeçare në Zvicrën gjermane dhe në atë frannkofone, nga 4 deri më 14 dhjetor.

Një shumicë e qartë e zviceranëve supozon se vaksina ofron mbrojtje (62 për qind) dhe gjithashtu do të jetë e sigurt (57 për qind). 63 përqind gjithashtu besojnë se Zyra Federale e Shëndetit Publik (BAG) do të marrë vendimet e duhura kur bëhet fjalë për sigurimin e  vaksinës.

Por, megjithatë, një shumicë (57 për qind) nuk dëshirojnë të vaksinohen sa më shpejt të jetë e mundur, përcjell albinfo.ch. Një arsye: Shumë prej tyre janë veçanërisht skeptikë në lidhje me vaksinën e koronës, thotë Martina Staub nga Marketagent.com Schweiz në njoftim.

Një shumicë (53 për qind) shprehen kështu: “Unë jam pro vaksinimeve në parim, por në rastin e koronës nuk do të vaksinohesha sepse kemi shumë pak përvojë me këtë vaksinë”.

Gratë, në këtë anketë janë përgjigjur pozitivisht në mënyrë të konsiderueshme më shpesh sesa burrat.

---