Viti 2015: 26.000 viktima nga katastrofat natyrore

Bëhet fjalë për një dyfishim të numrit të viktimave në krahasim me atë të vitit 2014, konstatohet në një studim të kompanisë së sigurimeve Swiss Re

Gjatë vitit që po kalon në katastrofat natyrore që kanë ndodhur në gjithë botën kanë humbur jetën 26.000 njerëz. Edhe pse këto janë shifra të përkohshme, ende jo përfundimtare, bëhet fjalë për një dyfishim të numrit të viktimave në krahasim me atë të vitit 2014, konstatohet në një studim të kompanisë së sigurimeve Swiss Re, të publikuar sot.

Më së shumti viktima, rreth 9.000 sish ose një të tretën e numrit të gjithëmbarshëm, ka shkaktuar tërmeti i ndodhur në muajin prill në Nepal. Ndërsa gjatë verës me vapë rekorde në vendet si India, Pakistani pastaj në Afrikën e Veriut dhe në Lindjen e Afërme kanë gjetur vdekjen më shumë se 5000 persona, shkruan srf.ch.

Po ashtu disa mijëra njerëz janë mbytur nga uji në Detin Mesdhe, në përpjekjet e tyre për të kaluar në kontinentin evropian me anije dhe barka të pasigurta për lundrim.