Vlahutin: Do jetë vit i vështirë, duhet bashkim Kombëtar

Sipas ambasadores së BE-së, Romana Vlahutin, Shqipërinë e pret një vit i gjatë shtyerjes së negociatave.

Ambasadorja e BE-së në Tiranë, Romana Vlahutin gjatë një tryeze të organizuar pas konkluzioneve të Bashkimit Evropian për shtyrjen e negociatave për vitin që vjen ka thënë se Shqipërinë e pret  një vit i vështirë.

Ajo u shpreh se deri në qershor 2019, kur edhe është caktuar data për hapjen e negociatave, Shqipëria ka një sfidë të madhe, që është politika.

Diplomatja e BE-së i bëri thirrje politikës shqiptare që të bashkohet, sepse në të kundër procesi i integrimit është shumë i vështirë.

“Do të keni një sfidë të madhe dhe kjo është politika. Ky proces kërkon që të ketë bashkim, jo bashkim retorik, jo bashkim në kuptimin e të folurit për objektiva të përbashkëta. Duhet të jetë një objektiv i mirëfilltë kombëtar, për të cilën punon gjithkush. Një gjë që e kemi konstatuar në çdo vend tjetër dhe mendoj që e shikoj edhe këtu është që disa grupe interesi do ta kenë kuptuar se çfarë nënkupton BE-ja dhe mund të dëshmojë nga shembuj të tjerë. Do të ketë disa grupe që nuk do të duhet të nxitojnë sepse nuk është në interesin e tyre”, ka thënë ajo.

Në këtë tryezë morri pjesë edhe Raportuesi për Shqipërinë në BE, eurodeputeti Knut Fleckenstein.