Vodhi orën e bashkëlojtarit në vlerë prej 70 mijë eurosh

Sipas “L’Équipe”, klubi francez mund të vendosë ta përjashtojë nga ekipi

Zbulohet hajduti që i vodhi orën me vlerë 70 mijë euro futbollistit të Nices, Dolberg, i cili iu bashkua klubit francez për 20.5 milionë euro, që shkuan në arkat e Ajaxit të Amsterdamit.

Autori i vjedhjes së orës në dhomat e zhveshjes, që shkaktoi zemërimin e 21-vjeçarit, është një futbollist premtues i Nices, 18-vjeçari Lamine Diaby-Fadiga.

Dolberg, pasi vuri re mungesën e orës, nuk pranoi të stërvitej të nesërmen, madje kërcënoi se nuk do të luante kundër Dijonit.

Dolberg paraqiti një ankesë në polici dhe hajduti, siç njofton “L’Équipe”, do të marrë ndëshkimin e duhur për këtë veprim të shëmtuar, përcjell albinfo.ch.

Lëndimi që pësoi në këmbën e majtë në muajin prill ka bërë që Diaby-Fadiga të mos ketë asnjë minutë në këmbë në këtë sezon. Tashmë që është identifikuar se hajduti që vodhi orën e Dolberg e ardhmja e tij te Nice është kompromituar.

Për sulmuesin premtues ka nisur procedimi disiplinor, ndaj është thirrur të japë shpjegimet përkatëse. Sipas “L’Équipe”, klubi francez mund të vendosë ta përjashtojë nga ekipi.

---