VV-ja i dorëzon Hazirit mirënjohjen “e fituar” nga NASA

Kjo mirënjohje e tij i është dhënë pas raportimeve të fundit në media se mirënjohja të cilën kryetari i Komunës së Gjilanit Lutfi Haziri, tha se e ka marrë nga presidenti i SHBA-së Donald Trump, u jepet vetëm shtetasve amerikanë

Lëvizja Vetëvendosje në Gjilan i ka dhuruar kryetarit të komunë, Lutfi Haziri, një mirënjohje të NASA-së, për kontributin e tij ndaj hapësirës. Kjo mirënjohje e tij i është dhënë pas raportimeve të fundit në media se mirënjohja të cilën kryetari i Komunës së Gjilanit Lutfi Haziri, tha se e ka marrë nga presidenti i SHBA-së Donald Trump, u jepet vetëm shtetasve amerikanë

Aktivisti i kësaj partie, Luan Aliu, ka thënë se nuk janë të autorizuar për të dhuruar një mirënjohje të tillë por që sipas tij, kjo nuk ka rëndësi. “Sot i kemi sjellë një tjetër “mirënjohje”, që ka kushtuar diku rreth 8 dollarë, e që vjen nga administratori ekzekutiv i NASA-s, në shenjë falënderimi për kontributin e madh të tij për hapësirën.

Sipas NASA-s, ekspertë të shumtë të saj, nëpërmjet satelitëve të vendosur në hapësirë, kanë arritur të detektojnë sinjale të veçanta, të cilat kanë ardhur pikërisht nga Lutfi Haziri, sinjale këto që japin shenja të një shpirti human dhe kontribues të qytetit të Gjilanit”, ka thënë Aliu.

Aktivistët e kësaj partie thanë se kryetarit të cilit u nda “dekorata” me këtë çmim, iu arrestuan dy drejtorë,të dy drejtorive shumë të rëndësishme, ai i Inspeksionit dhe ai i Urbanizmit, e ka nën akuzë drejtorin e një drejtorie tjetër mjaft të rëndësishme, asaj të Shërbimeve Publike.

“Për këto dhe shumë arsye të tjera, ne i jemi shumë “mirënjohës” Lutfi Hazirit për gënjeshtrat e një pas njëshme që na I servon, në mesin e së cilave hyn edhe ajo e dhjetorit 2015, kur qarkulluan fotografitë e billboardit në Kanada, që I uronte mirëseardhjen madhërisë së tij, Lutfi Hazirit”, kanë thënë drejtuesit e VV-së të cilët njoftuan se javën që vjen do të thërras seancë në kuvendin komunal  për të kërkuar dorëheqjen e Hazirit.