Xhaka dhe Shaqiri, në dy finale evropiane

Nëse Liverpooli fiton Ligën e Kampionëve dhe Arsenali triumfon në Ligën e Evropës, atëherë, Superkupa e Evropës do të fliste ‘shqip’ me tre futbollistë shqiptarë në fushë

Ishin pjesë e Baselit dhe dolën nga akademia e klubit zviceran. Ishin pjesë e grupmoshave të Zvicrës dhe më pastaj Kombëtares A helvetike. Xherdan Shaqiri dhe Granit Xhaka janë miq shumë të mirë, derisa ky vit ishte shumë i suksesshëm për dy yjet shqiptarë.

Të dy bënë shqiponjën pasi shënuan ndaj Serbisë dhe më pas u ndodhën në qendër të polemikave, përcjell albinfo.ch.

Shaqiri dhe Xhaka kanë gjasa të mëdha që këtë sezon ta përfundojnë një trofe evropian.

Xherdani me Liverpoolin është kualifikuar në finale të Ligës së Kampionëve, ku takohet me Tottenhamin, ku ylli shqiptar ka mundësi që për herë të dytë të fitojë trofeun më të madh për klube në Evropë. Liverpooli po lufton edhe për titullin e Premierligës, ku është një pikë pas Manchester Cityt, derisa të dielën zhvillohet xhiroja e fundit.

Arsenali u kualifikua në finale të Ligës së Evropës. Granit Xhaka dhe Shkodran Mustafi janë pjesë e rëndësishme e skuadrës londineze. Arsenali ndeshet me skuadrën tjetër londineze, Chelsean, në finalen e Ligës së Evropës, që zhvillohet në Baku më 31 maj.

Nëse Liverpooli fiton Ligën e Kampionëve dhe Arsenali triumfon në Ligën e Evropës, atëherë, Superkupa e Evropës do të fliste ‘shqip’ me tre futbollistë shqiptarë në fushë.

---