Xhaka: Jam krenar që jam kapiten i Arsenalit

Granit Xhaka është shprehur krenar që është kapiten i Arsenalit, tashmë edhe zyrtarisht

Mesfushori shqiptar, Granit Xhaka, ditë më parë u emërua zyrtarisht kapiten i Arsenalit.

Një e arritur për futbollistin shqiptar, që pavarësisht kritikave, do të jetë lider për skuadrën londineze.

“Trajneri na kërkoi neve t’i shkruajmë pesë emra, kë dëshironim ta kishim kapiten. Gjithçka ishte e fshehtë, kështu që nuk kishte emra. Thjesht i shkruam nga pesë kapitenë”, ka treguar Xhaka se si u zgjodh kapiten i Arsenalit, përcjell albinfo.ch.

“Në fund, mendoj se skuadra, lojtarët dhe natyrisht trajneri, vendosën se kush do të jetë kapiteni i parë nga ata pesë”, shtoi tutje ylli shqiptar, i cili gjithashtu është kapiten edhe te Zvicra.

“Jam shumë krenar. Kjo më ka bërë shumë të lumtur sepse, kur erdha këtu, kisha shumë përvojë me ekipin kombëtar të Zvicrës dhe unë isha edhe kapiten në Gjermani gjithashtu”, ka thënë Xhaka për revistën “Arsenal Player”. Xhaka ishte kapiten edhe te Borussia Moenchengladbach, nga ku u transferua në Arsenal.

“Kur unë erdha këtu, kishte lojtarë të mrekullueshëm, personalitete të mira dhe ishte një hap i madh për mua të jem kapiten edhe këtu. Tani, unë jam kapiteni zyrtar dhe ndihem shumë krenar që jam kapiteni i kësaj skuadre të mrekullueshme.

Ky është roli i një kapiteni, të jesh i fuqishëm dhe të jesh përpara skuadrës. Unë mendoj se jam person i tillë, i cili mund të qëndrojë përpara skuadrat gjatë kohëve të mira, por edhe gjatë kohëve të vështira”, shtoi ndër të tjera Xhaka.

---