Xhaka në Leverkusen vazhdon serinë pa humbje

Tani Leverkuseni i ka 35 ndeshje rresht pa humbje. Ndeshja e kthimit është më 14 mars në “BayArena”.

Ishte Patrik Schick ai i cili ka shënuar gol në minutën e 92-të për t’i mundësuar Bayer Leverkusenit që ta vazhdojë serinë e ndeshjeve pa humbje, përcjell albinfo.ch.

Të enjten mbrëma Leverkuseni ishte duke pësuar 2:0 nga Qarabagu në Baku të Azerbajxhanit. Ishte ndeshja e parë e një të tetës së finales në Ligën e Evropës. Yassine Benzia shënoi për 1:0 në minutën e 26-të, ndërsa Juninho realizoi në minutën e dytë shtesë të pjesës së parë për 2:0.

Trajneri i Leverkusenit kishte vendosur të pushojë Granit Xhakën dhe disa startues të tjerë. Por ndeshja nuk shkonte sipas planit. Xhaka u aktivizua në minutën e 58-të së bashku me Florian Wirtz. Pikërisht Wirtz shënoi për 2:1 në minutën e 70-të. Leverkuseni rriti presionin, ndërsa në minutën e 80-të u bënë edhe dy ndryshime të tjera në formacion. Në lojë hyri edhe Schick. Dhe pikërisht ai shënoi golin e barazimit 2:2 në minutën e 92-të.

 

---