Zjarre masive në Francë: 20 mijë persona të evakuuar, temperaturat e larta përkeqësojnë gjendjen

(KEYSTONE/Gaetan Bally)

Më shumë se 20 mijë persona janë evakuuar nga jugperëndimi i Francës për shkak të zjarreve që kanë përfshirë rajonin e Girondës.

Autoritetet franceze kanë paralajmëruar se situata mbetet kritike për shkak të temperaturave të larta dhe erërave të forta teksa bëhet e ditur se rreth 12 mijë banorë dhe turistë janë larguar tashmë nga zonat e rrezikuara, ndërsa po zhvillohet evakuimi i 8,800 personave të tjerë.

Si pasojë e zjarrit janë shkatërruar deri tani afro 3,100 hektarë tokë pranë Gjirit të Arcachon, transmeton albinfo.ch.

Shumica e të evakuuarve janë turistë që pushonin në kampingjet e gadishullit Lège-Cap-Ferret, ndërsa evakuime parandaluese janë kryer edhe në fshatin Claouey. Prefektja e Girondës, Sophie Brocas, bëri të ditur se deri më tani nuk raportohet për të lënduar, ndërsa disa rrugë dhe zona pyjore janë mbyllur për arsye sigurie.

Shefi i zjarrfikësve të Girondës, Marc Vermeulen, tha se ekipet kanë punuar pa ndërprerje gjatë gjithë natës, por paralajmëroi se rritja e temperaturave dhe ndryshimi i drejtimit të erës e bëjnë zjarrin të vështirë për t’u parashikuar.

Ndryshe, për shkak të situatës dy zjarrfikës humbën jetën më herët gjatë javës duke luftuar një tjetër vatër pranë aeroportit të Bordeaux.