Më 29 nëntor, qytetarët zviceranë do të votojnë për ndalimin e përdorimit privat të fishekzjarrëve të zhurmshëm. Nismëtarët thonë se ato dëmtojnë kafshët, rrezikojnë njerëzit dhe ndotin mjedisin.
Komiteti nismëtar ka nisur fushatën për ndalimin e fishekzjarrëve të zhurmshëm në Zvicër, duke theksuar se zhurmat e tyre shkaktojnë frikë dhe panik te kafshët shtëpiake, ato të fermave dhe kafshët e egra.
Sipas Sigurimit Zviceran Kombëtar të Aksidenteve (Suva), në vend regjistrohen rreth 260 aksidente në vit të lidhura me fishekzjarrët, përfshirë djegie dhe dëmtime të shikimit. Ndërkohë, sipas Këshillit Federal, përdorimi i tyre gjeneron rreth 1.300 tonë mbeturina në vit.
Nisma parasheh ndalimin në nivel kombëtar të fishekzjarrëve të zhurmshëm për përdorim privat. Nga ndalimi do të përjashtoheshin mjetet piroteknike pa shpërthime të forta, si xixëllonjat dhe fontanat piroteknike. Për ngjarje të mëdha, autoritetet do të mund të lejonin përjashtime të veçanta.
Nismën e kundërshtojnë Këshilli Federal, shumica e Parlamentit dhe përfaqësues të industrisë së fishekzjarrëve. Ata argumentojnë se autoritetet lokale tashmë kanë mundësi të kufizojnë përdorimin e tyre dhe paralajmërojnë për pasoja ndaj traditave dhe bizneseve të sektorit.
Votimi për këtë nismë do të mbahet më 29 nëntor.
