Zvicër: Kantonet kërkojnë përfundimin e bllokimit më 1 mars

Edhe këshilltarët qeveritarë nga kantone si Valisi, Gjeneva, Fribourgu dhe Zugu - ku numri i rasteve të koronës aktualisht është më i lartë - duan t'i japin fund mbylljes

Këshilltarë të ndryshëm qeveritarë nga kantonet por edhe shoqatat e biznesit, po bëjnë presion mbi Këshillin Federal për të prezantuar më në fund një plan daljeje nga bllokimi.
Javën tjetër, qeveria do të diskutojë për lehtësimin e masave të izolimit në lidhje me pandeminë. Kërkesa për një strategji daljeje po bëhet më e fortë – dhe e mbështetur gjerësisht, shkruan srf.ch.

Disa përfaqësues kantonalë tani po kërkojnë që shitoret që janë mbyllur, të lejohen të rihapen nga 1 marsi.

“SonntagsZeitung” shkruan se edhe këshilltarët qeveritarë nga kantone si Valisi, Gjeneva, Fribourgu dhe Zugu – ku numri i rasteve të koronës aktualisht është më i lartë – duan t’i japin fund mbylljes.

Presioni nga kantonet

“Lehtësimi tani është i mundur”, citohet të ketë thënë kreu i Qeverisë së Kantonit të Valisit Christophe Darbellay, transmeton albinfo.ch. Së pari duhet të hapen dyqanet për nevoja jo të përditshme, ka thënë Darbellay për gazetën.

Për drejtorin e shëndetësisë të Kantonit të Gjenevës Mauro Poggia dhe homologun e tij nga Zugu, Martin Pfister, hapja e dyqaneve ka përparësi të madhe, transmeton albinfo.ch.

Për gazetën “SonntagsBlick”, Poggia është shprehur se edhe mjediset sportive, qendrat e fitnesit dhe pishinat duhet gjithashtu të rihapen më 1 mars.

Këshilltarja e Shtetit (ministrja kantonale) në Freiburg, Anne-Claude Demierre madje shprehet edhe në favor të një “hapjeje graduale të restoranteve” sipas “SonntagsZeitung”.

Ekonomia prezanton planin e hapjes 

Thirrje për lehtësim ka edhe nga ekonomia. Për shembull, federata e ekonomisë “Economiesuisse” dhe shoqata e punëdhënësve kanë paraqitur këtë javë para Këshillit Federal strategjinë e tyre të daljes  shkruan “NZZ am Sonntag”, përcjell albinfo.ch. Edhe ato  po bëjnë thirrje gjithashtu për lehtësimin që duhet të bëhet nga fillimi i marsit.

Pastaj, sipas vullnetit të ekonomisë, të gjitha dyqanet duhet të rihapen, rregulli i grumbullimit të pesë vetave të zbutet  dhe detyrimi i punës në shtëpia (Home office) të hiqet.

Shoqatat në fjalë, relaksimet e mëtejshme i lidhin me përparimin e fushatës së vaksinimit dhe gatishmërinë e qytetarëve për tu vaksinuar.

---