Zvicër: Shtëpitë pranë bazave të F-35A do të pajisen me dritare izoluese ndaj zhurmës

(KEYSTONE/Peter Schneider)

Banorët që jetojnë pranë bazave ushtarake ajrore në Payerne, Meiringen dhe Emmen do të pajisen me dritare izoluese ndaj zhurmës, me qëllim uljen e ndotjes akustike të shkaktuar nga avionët luftarakë F-35A. Rreth 230 ndërtesa janë të përfshira në këtë masë, transmeton albinfo.ch.

Ministria Federale e Mbrojtjes e Zvicrës njoftoi të hënën se 170 shtëpi në Emmen (kantoni Lucern), 30 në Payerne (Vaud) dhe 30 në Meiringen (Bernë) do të pajisen gjithashtu me matës inteligjentë të zhurmës. Këshilli Federal ka paraqitur për miratim në parlament një buxhet prej 30 milionë frangash zvicerane për realizimin e projektit.

Punimet e instalimit pritet të fillojnë në vitin 2027, ndërsa banorët e zonave të prekura do të informohen gjatë kësaj jave.

Rreth 550 shtëpi të prekura nga zhurma

Sipas autoriteteve, ndërtesa të tjera në zonat përreth bazave ajrore tashmë janë pajisur me masa mbrojtëse. Në total, rreth 550 shtëpi ndikohen nga ndotja akustike e avionëve.

Zvicra planifikon të blejë 30 avionë luftarakë amerikanë F-35A. Sipas planit, ata do të vendosen në Payerne nga viti 2028, në Meiringen nga 2030 dhe në Emmen nga 2032.