Zvicra, 36 miliardë për arsimin

Shuma në fjalë (e shpenzuar në vitin 2014) është për 8.6 miliardë më e lartë se ajo e vitit 2005. Ndryshe, kjo shumë përbën 5.6 për qind e prodhimit të përgjithshëm shoqëror të Zvicrës për vitin 2014 dhe është pak mbi mesataren e vendeve të OECD-së

KEYSTONE

Zvicra po i shton investimet në fushë të arsimit. Kështu, gjatë vitit 2014 në këtë degë janë derdhur gjithsej 36 miliardë franga, që është për 8.6 miliardë më shumë se në vitin 2005. Këto të dhëna i ka publikuar sot Zyra Federale për Statistika, shkruan albinfo.ch

Shuma në fjalë është 5.6 për qind e prodhimit të përgjithshëm shoqëror të Zvicrës për vitin 2014 dhe është pak mbi mesataren e vendeve të OECD-së, ku ajo është 4.8%. Ndërkaq Zvicrës me përqindje në këtë pikë ia kalojnë Norvegjia me 7.3% dhe Danimarka me 7.2% të prodhimit të përgjithshëm shoqëror. Hungaria me 3.3% është në fund të listës.

Sipas një përllogaritjeje, afërisht dy të tretat e shpenzimeve i kanë bartur kantonet, dhjetë për qind komunat dhe dhjetë për qind federata.

Rreth gjysma e parave ndahen për shkollimin fillor, të detyruar. Vetëm në kantonet Basel-stadt, Gjenevë, Bernë dhe Ticino, shpenzimet për shkollimin  fillor janë më të ulëta se 50 për qind, transmeton albinfo.ch. Marrë në përgjithësi, shpenzimet për arsim janë në vendin e dytë për nga sasia në buxhetet e federatës, kantoneve dhe komunave.