Zvicra dëbon në Kosovë sulmuesin e taksistëve

Pasi ka mbajtur 13 muaj burg ai tash, me vendimin e gjyqit, duhet të dëbohet në vendlindjen e tij, në Kosovë, edhe pse ai jeton në Zvicër që nga viti 1995, pra që kur kishte vetëm 5 vjet

Një kosovar sot 23 vjeç, në vitin 2010 ishte dënuar me 3 vjet burg për plaçkitje, lëndim të shumëfishtë trupor, shkaktim të shumëfishtë të dëmeve materiale, vjedhje dhe armëmbajtje pa leje. Pasi ka mbajtur 13 muaj burg ai tash, me vendimin e gjyqit, duhet të dëbohet në vendlindjen e tij, në Kosovë, edhe pse ai jeton në Zvicër që nga viti 1995, pra që kur kishte vetëm 5 vjet.

Një nga veprat penale që i ngarkohen atij është plaçkitja me dhunë e një taksisti. Ai ia kishte lidhur taksistit në fjalë një tel të dryrit të biçikletës rreth qafës për t`ia grabitur paratë e pazarit të ditës. Në një rast tjetër ai kishte sulmuar po ashtu një taksist, duke ia mbajtur thikën në fyt, për t`ia marrë ndërkohë portofolin me para.

Paratë i duheshin, për të blerë ushqim në kioskun e afërm!

Edhe para se të fillonte vuajtjen e burgut, Zyra Kantonale për Migracion e Argaut ia kishte tërhequr atij lejen e përhershme të qëndrimit në Zvicër duke ia mohuar qëndrimin e mëtejmë në këtë shtet.

Më tutje, si Gjykata për të drejtën e të huajve ashtu dhe Gjykata Federale e kishin miratuar qëndrimin e zyrës në fjalë.

Sipas Gjykatës Federale, si instanca më e lartë, është e pakontestueshme se me dënimin me burg, kosovari kishte plotësuar kriteret për t`ia hequr të drejtën e qëndrimit të përhershëm në Zvicër. Edhe dëbimi i tij nga Zvicra, sipas kësaj gjykate është i zbatueshëm dhe “proporcional me veprat e kryera”.

“Me energjinë kriminale të treguar nga ai, nuk mund të neglizhohet rreziku i përsëritjes së delikteve. Kosovari nuk është i integruar me profesion në Zvicër, nuk ka mbaruar asnjë profesion dhe nuk ka vend pune. Kthimi i tij në Kosovë është i realizueshëm edhe për faktin se një pjesë e familjes së tij jeton në Kosovë”, thuhet në qëndrimin e Gjykatës Federale të Zvicrës.