Zvicra është ftuar të marrë pjesë në një takim të organizuar nga Komisioni Evropian, ku do të diskutohen kërcënimet me bomba në trafikun ajror evropian. Takimi do të mbahet të mërkurën në Bruksel, përcjell albinfo.ch.
Në takim janë ftuar ekspertë të sigurisë së aviacionit nga shtetet anëtare të Bashkimit Evropian, si dhe nga Norvegjia, Zvicra dhe Islanda. Këtë e konfirmoi zëdhënësja e Komisionit Evropian, Anna-Kaisa Itkonen.
Sipas saj, ekspertët do të shqyrtojnë situatën aktuale dhe do të diskutojnë masat e mundshme për t’iu përgjigjur këtyre kërcënimeve.
Gjatë javës së kaluar, një numër i madh kërcënimesh me bomba shkaktuan ndërprerje dhe pengesa në trafikun ajror në disa vende evropiane./Albinfo.ch
