Çmimet e konsumit në Kosovë janë rritur për 7.1 për qind në tetor 2026, krahasuar me të njëjtën periudhë të vitit të kaluar, sipas të dhënave të publikuara nga Agjencia e Statistikave të Kosovës (ASK), përcjell albinfo.ch.
Rritja vjetore e çmimeve është ndikuar kryesisht nga shtrenjtimi i transportit për 21.5 për qind, ndërsa grupi i strehimit, ujit, energjisë elektrike, gazit dhe lëndëve të tjera djegëse ka shënuar rritje prej 9.7 për qind.
Rritje të çmimeve janë regjistruar edhe te pijet alkoolike, duhani dhe narkotikët me 5 për qind, restorantet dhe shërbimet e akomodimit me 4.5 për qind, si dhe kujdesi personal, mbrojtja sociale dhe mallrat e shërbimet e ndryshme me 3.7 për qind.
Ndërkohë, ushqimet dhe pijet joalkoolike janë shtrenjtuar për 3.2 për qind, mobiljet dhe pajisjet shtëpiake për 2.9 për qind, po aq edhe shërbimet shëndetësore. Rritje janë shënuar edhe te veshjet dhe këpucët (2.3%), rekreacioni, sporti dhe kultura (1%), informacioni dhe komunikimi (0.7%), si dhe sigurimet dhe shërbimet financiare (0.3%).
Në anën tjetër, rënie e çmimeve është regjistruar vetëm te shërbimet arsimore, me 0.3 për qind.
Sa i përket krahasimit mujor, ASK-ja bën të ditur se Indeksi i Harmonizuar i Çmimeve të Konsumit në tetor 2026 nuk ka shënuar ndryshim në raport me shtatorin.
Megjithatë, brenda grupeve të ndryshme të konsumit janë evidentuar lëvizje të çmimeve. Rritjet më të theksuara mujore janë regjistruar te strehimi, uji dhe energjia elektrike me 1.7 për qind, si dhe te ushqimet dhe pijet joalkoolike me 1.1 për qind.
Në të njëjtën periudhë, çmimet e transportit kanë rënë për 2.2 për qind, ndërsa ato të rekreacionit, sportit dhe kulturës për 1.4 për qind. Rënie të lehta janë regjistruar edhe te veshjet dhe këpucët, si dhe te informacioni dhe komunikimi, me nga 0.1 për qind.
Të dhënat janë pjesë e raportit të ASK-së për Indeksin e Harmonizuar të Çmimeve të Konsumit për muajin tetor 2026./Albinfo.ch
