Zvicra mbështet Kuvendin e Kamenicës

Agjencia Zvicerane për Zhvillim (SDC) nëpërmjet programit DEMOS ka organizuar punëtori lidhur me planin e punës të Kuvendit komunal të Kamenicës për vitin 2015

Qeveria e Zvicrës nëpërmjet projektit (DEMOS) që funksionon në Kosovë, ka organizuar punëtori në komunën e Kamenicës, lidhur me planin e punës të Kuvendit komunal për vitin 2015, në programin e decentralizimit dhe në atë të vetëqeverisjes lokale.

(DEMOS) është program i financuar nga Agjencia Zvicerane për Zhvillim (SDC).

DEMOS-in e përfaqësonin, Fatime Rrahmani dhe konsulenti Ramadan Klisurica. Të pranishëm në këtë punëtori pos kryesuesit të Kuvendit, Bajram Dermaku, ishin edhe këshilltarët e Kuvendit komunal dhe drejtorët e drejtorive komunale, përfaqësues të disa zyrave komunale, thuhet në një njoftim zyrtarë të Komunës së Kamenicës.

Ky është takimi i dytë në kuadër të bashkëpunimit të komunës së Kamenicës me përfaqësues të DEMOS-it.

Gjatë punëtorisë është arritur të krijohet një version i planit të punës së Kuvendit komunal i cili plan pritet të plotësohet edhe gjatë ditëve të ardhshme, si dhe të aprovohet në seancën e ardhshme të Kuvendit të komunës.

Fatime Rrahmani foli për fushë veprimtarinë e DEMOS-it, dhe bashkëpunimin që do të kenë me komunën e Kamenicës.

Kryesuesi i Kuvendit komunal, Bajram Dermaku e falënderoi angazhimin e DEMOS-it, për të ndihmuar komunën në disa fusha, por nuk e la pa e përmendur edhe ish projektin LOGOS, për kontributin e dhënë në këtë komunë.

“Kamenica shquhet për transparencë dhe llogaridhënie dhe ne po bëjmë çmos që Asambleja Komunale e Kamenicës të jetë shembull i funksionimit të të gjitha organeve të saja” ka thënë Dërmaku.