Zvicra ndërpret lidhjet me tri OJQ palestineze

(KEYSTONE/Peter Klaunzer)

Zvicra po përfundon bashkëpunimin e saj me tri organizata joqeveritare palestineze (OJQ), pasi i ka akuzuar për “shkelje të kodit të sjelljes dhe klauzolës kundër diskriminimit”.

Tri OJQ-të e mëposhtme palestineze janë përjashtuar nga mbështetja zvicerane: Qendra Palestineze për të Drejtat e Njeriut (PCHR), Rrjeti Palestinez i OJQ-ve (PNGO) dhe Al-Shabaka/Rrjeti i Politikave Palestineze. Ministria e Jashtme e konfirmoi vendimin të premten në një intervistë me agjencinë e lajmeve Keystone-SDA pas vendimit të qeverisë zvicerane të mërkurën, përcjell swissinfo.

Pas sulmit terrorist të Hamasit në Izrael më 7 tetor, gjashtë OJQ palestineze dhe pesë izraelite u audituan, ndërsa tetë nga këto 11 organizata joqeveritare mbeten partnerë në programin e bashkëpunimit zviceran në Lindjen e Mesme, shkruan albinfo.ch.

E themeluar në vitin 1995 nga avokatë dhe aktivistë palestinezë, PCHR që atëherë ka marrë mbështetje financiare nga vende të ndryshme evropiane dhe Shtetet e Bashkuara të Amerikës, teksa është e vendosur në qytetin e Gazës.

PNGO është një organizatë ombrellë për dhjetëra organizata palestineze në Bregun Perëndimor, Jerusalemin Lindor dhe Rripin e Gazës. Anëtar i BDS (“Bojkot, Divestment dhe Sanksione”), ajo mbështet bojkotin dhe sanksionet kundër Izraelit, e themeluar në vitin 2005 nga Omar Barghouti, ajo është e vendosur në Ramallah. “Bojkot, Divestim, Sanksione” bën fushatë për një bojkot mbarëbotëror të Izraelit, derisa të tërhiqet nga territoret që ka pushtuar që nga viti 1967, në kundërshtim me ligjin ndërkombëtar.

Së fundmi, Al-Shabaka, me qendër në Washington, u themelua në vitin 2013 dhe e përshkruan veten si instituti i parë i pavarur palestinez dhe numëron intelektualë nga Universiteti Columbia në New York si pjesëmarrësit e tij.