Zvicra, në vendin e 36 në botë për numrin e grave deputete

Në zgjedhjet parlamentare që u mbajtën vitin e kaluar në Dhomën Nacionale të Parlamentit të Zvicrës u zgjodhën gjithsej 64 deputete (femra). Ësshtë ky numri më i madh i arritur deri më tash.

Por, me gjithë këtë arritje, vendi i Zvicrës në radhitjen ndërkombëtare gjatë vitit të kaluar ka pësuar rënie sa i përket kësaj pike. Kështu, nëse një vit më parë Zvicra ishte në vendin e 34, pas zgjedhjeve të kaluara ajo, me 32% të parlamentarëve femra, rrëshqiti në vendin e 36 në botë. Ndërsa në vitin 2004 Zvicra me edhe më pak deputete se tash, ishte në vendin e 22-të.

Është interesante se shkaktare të rënies së rangut të Zvicrës janë kryesisht shtetet afrikane dhe latinoamerikane. Janë ato që duke shtuar numrin e deputeteve janë ngjitur më lartë në ranglistë.

Vendin e parë në këtë ranglistë prej vitesh e zë shteti afrikan, Ruanda, me pothuaj dy të tretat e deputetëve, femra! Pas saj vijnë Bolivia dhe Kuba. Ndërsa në Evropë, si zakonisht, janë shtetet skandinave ato që janë në krye të listës.