Zvicra përuroi solemnisht “projektin e shekullit”, tunelin e gjatë 57 km

Keystone

11 dhjetori ka qenë një ditë e veçantë  për Zvicrën. Pas 17 vitesh pune intensive ka përfunduar ai që ndonjëherë me të drejtë është quajtur “projekti i shekullit”, hapja e tunelit bazik të Gothard-it.

Hapja zyrtare e tunelit është shënuar me një udhëtim festiv të trenit të parë i cili është nisur nga Bazeli në orën 4.54 në drejtim të Luganos, transmeton albinfo.ch mediat zvicerane të cilat sot kanë raportuar gjerësisht rreth këtij aktiviteti. Në këtë tren mallrash është inkuadruar enkas për këtë rast një vagon udhëtarësh ku kanë zënë vend zyrtarë të lartë të Ndërmarrjes Federale të hekurudhave të Zvicrës (SBB/CFF) dhe funksionarë federalë, kantonalë etj.

Një orë më vonë është nisur nga Cyrihu treni i rregullt në drejtim të Luganos.

Me hapjen zyrtare të tunelit bazik të Gothardit, në gjithë rrjetin hekurudhor të Zvicrës është vendosur edhe orari i ri vjetor, me ndryshime, i qarkullimit të udhëtarëve me trenat e SBB-së.

Ky tunel hekurudhor me 57 kilometrat e tij është më i gjati në botë dhe mundëson një shkurtim të ndjeshëm të rrugës në mes të pjesës veriore dhe jugore të Zvicrës, transmeton albinfo.ch. Në gjendjen e tashme, kjo rrugë bëhet për 30 minuta më shpejt ndërsa në fund të vitit 2020, pas disa punimeve plotësuese, përfitimi që do të kenë shfrytëzuesit e trenit do të jetë 45 minuta.

Tuneli i ri mundëson zhvillimin e shpejtësisë prej 200 kilometrash në orë për trenat e udhëtarëve dhe 100 km në orë për trenat e mallrave.

Bë pikun e punimeve, në këtë tunel kanë qenë të angazhuar deri në 2400 punëtorë përnjëherësh dhe është punuar në tre ndërrime.

E gjithë kostoja e këtij projekti gjigant, i quajtur me emrin e përbashkët NEAT ku përfshihet edhe tuneli Lötschberg  dhe ai Ceneri, ka qenë 23 miliardë franga.