Zvicra planifikon të dëbojë 20 kriminelë afganë dhe shqyrton dëbimet në Siri

Deri më tani, Zvicra nuk ka qenë në gjendje të kryejë asnjë kthim të detyruar në Siri - ndryshe nga Austria dhe, së fundmi, Gjermania

Zvicra synon të deportojë rreth 20 shtetas afganë që janë dënuar për krime. Sekretariati Shtetëror për Migracionin (SEM) i konfirmoi gazetës “Sonntags Blick” se një kriminel afgan ishte kthyer tashmë në Kabul në mesin e dhjetorit.

Kthimi i sirianëve është gjithashtu në diskutim dhe SEM është në kontakt me autoritetet siriane në lidhje me këtë çështje, transmeton albinfo.ch.

Deri më tani, Zvicra nuk ka qenë në gjendje të kryejë asnjë kthim të detyruar në Siri – ndryshe nga Austria dhe, së fundmi, Gjermania. Megjithatë, disa anëtarë të Parlamentit Zviceran tani po kërkojnë veprime më të shpejta.

“Nëse Gjermania mund të kthejë njerëz në Siri, edhe Zvicra mundet. Pres që autoritetet më në fund të kalojnë nga fjalët në veprime”, citoi “SonntagsBlick” Damian Müller, një anëtar i Dhomës së Kantoneve nga Lucerna që përfaqëson FDP-në (Partia Liberale).

---