Zvicra po “zvarritet” në furnizimin e vaksinës kundër lisë së majmunit

Zvicra nuk ka plane të menjëhershme për të ofruar vaksina në vendet e prekura rëndë nga infeksioni viral mpox, pavarësisht thirrjeve nga Organizata Botërore e Shëndetësisë që vendet më të pasura të ndajnë stoqet e vaksinave.

Sidoqoftë, situata po monitorohet nga afër, tha për Keystone-ATS Zyra Federale e Shëndetit Publik (FOPH).

Zvicra ka blerë 40,000 doza të vaksinës, të cilat janë shpërndarë nëpër kantone. Deri më sot, sipas FOPH, janë administruar 13,000 doza, transmeton albinfo.ch.

Të premten, OBSH u kërkoi vendeve me rezerva vaksinash që t’i shpërndajnë ato në vendet e prekura nga epidemia. Prodhuesit gjithashtu pritet të rrisin prodhimin.

Të mërkurën, OBSH kishte shpallur nivelin më të lartë të alarmit për shkak të përhapjes së variantit të ri mpox 1b në disa vende afrikane.

E pyetur për këtë temë, FOPH konsideron se rreziku i infektimit në Zvicër është shumë i ulët dhe se shumica e personave të rrezikuar në Zvicër janë vaksinuar, raporton swissinfo.

Sëmundja, e njohur prej dekadash si lija e majmunit, mund të transmetohet nga kafshët, por edhe nga njeriu te njeriu në rast kontakti të ngushtë, për shembull gjatë marrëdhënieve seksuale. Simptomat përfshijnë pustula të ngjashme me linë në lëkurë, ethe dhe dhimbje në gjymtyrë.