Zvicra rrit misionin e saj ushtarak në Kosovë

Qeveria Federale ka vendosur të rrisë kontigjentin Swisscoy dhe të dërgojë 20 anëtarë shtesë të ushtrisë së saj, në Kosovë

Këshilli Federal vendosi ka vendosur  të mërkurën (sot, 29 nëntor) të rrisë kontigjentin Swisscoy dhe të dërgojë 20 anëtarë shtesë të ushtrisë në Kosovë, transmeton albinfo.ch lajmin e bërë të ditur në një komunikatë e Qeverisë Federale të Zvicrës. Zvicra, që nga përfundimi i luftës, merr pjesë në misionin paqeruajtës të NATO-s Forca e Kosovës (KFOR) në Kosovë me njësitin e ushtrisë, të quajtur Swisscoy.

Këshilli Federal në komunikatën e tij për media shkruan se rreth 200 pjesëtarë të ushtrisë zvicerane aktualisht janë të stacionuar në Kosovë. Me rritjen e kuotës, Zvicra po mbyll hendekun që do të lihet nga tërheqja e dy njësive nga Austria në pranverën e 2024-ës.

Në qershor të vitit 2023, Parlamenti miratoi pjesëmarrjen zvicerane në KFOR dhe zgjatjen deri më 31 dhjetor 2026. Parlamenti gjithashtu i ka dhënë Këshillit Federal autoritetin për të rritur numrin e pjesëtarëve të ushtrisë me një maksimum prej 30.

---