10 të vdekur nga aksidenti në Australi

Aksidenti, Australi

10 persona kanë vdekur në një aksident me autobus në rajonin e Hunter të Australisë.

Autobusi transportonte mbi 50 të ftuar në dasmë kur u përmbys.

Njëzet e pesë të tjerë pësuan lëndime dhe u dërguan në spital, dy prej të cilëve duhej të transportoheshin me helikopter, thanë autoritetet, shkruan DW.

Aksidenti ka ndodhur në orën 23:30 të dielën pranë qytetit Greta, i njohur për vreshtat dhe vendet e dasmave.

Autobusi, i cili ishte marrë me qira për të transportuar mysafirë nga një dasmë e mbajtur në një punishte vere lokale, doli nga një rampë në një rrethrrotullim, duke bërë që ai të përmbysej, përcjell albinfo.ch.

Shkaku i saktë i aksidentit është duke u hetuar, por zyrtarët thonë se në atë moment ka pasur mjegull të dendur në zonë.

Ndihmës Komisioneri në detyrë i Policisë, Tracy Chapman, tha se shoferi, një burrë 58-vjeçar, është arrestuar. Ai gjithashtu ishte duke u testuar për drogë dhe alkool, shkruan DW.

I dyshuari më vonë u akuzua për 10 vepra në lidhje me drejtimin e rrezikshëm ose nga pakujdesia “me rast vdekjeje”.