10-vjeçarja: Nëna ishte mbuluar me gjak…

Durrës: Në dëshminë e saj, vajza 10-vjeçare thotë se lajmëroi gjyshin. Nëna ishte e mbuluar në gjak, babi kishte ikur

Tronditëse ka qenë dëshmia e vajzës 10-vjeçare e Lulëzim Cukut dhe Manjola Cukut, gruaja që u vra nga dora e bashkëshortit të saj ditën e shtunë në mbrëmje.

E mitura ka treguar se mes prindërve të saj kishte shpesh grindje dhe dhunë, ndaj edhe kishte qenë së bashku me të ëmën e ndjerë në polici, ku kishte bërë edhe kallëzim për dhunë në familje, prej ku ishte pajisur me urdhër mbrojtje.

Natën e krimit të rëndë, 3 fëmijët e çiftit ishin në gjumë, por janë zgjuar nga të bërtiturat e të ëmës, të cilën më pas e kanë gjetur të pajetë në tualet të mbuluar nga gjaku.

“Babai e dhunonte vazhdimisht nenën. Bashkë me nënën u detyruam të shkonim në polici, berem denoncim për babain. Gjykata dha urdhër mbrojtje për nënën. Atë ditë të ngjarjes, babai e dhunoi sërish dhe e ofendoi mamin. Më pas ne fjetëm, pas rreth një ore dëgjova të bërtitura dhe u zgjova.

Pashë që nëna ishte në banjë e vrare me thikë, banja ishte e mbyllur. Unë lajmetova gjyshin, i thashë të merrte në telefon policinë dhe ambulancën. Nga zhurmat u zgjua motra dhe vëllai, e hapëm derën dhe pamë nënën të mbuluar nga gjaku. Babai kishte ikur. Më pas erdhi policia”.

---