100 mijë euro gjoba për partitë në zgjedhjet lokale në Kosovë

Njëqind mijë euro është shuma e përgjithshme e gjobave të shqiptuara nga Paneli Zgjedhor për Ankesa dhe Parashtresa gjatë periudhës trijavore për zgjedhjet lokale të 22 tetorit 2017

Kryesuesi i Sekretariatit të PZAP-it, Mulë Desku ka thënë se gjobat e shqiptuara nga PZAP-i për shkeljet në fushatë për këto zgjedhje janë më të ulëta sesa në zgjedhjet paraprake.

“Gjatë zgjedhjeve lokale të vitit 2013 shuma e gjobave ka qenë 190,550 euro, ndërsa deri më tani për këto zgjedhje lokale ndaj subjekteve politike janë shqiptuar gjoba mbi 100,000 euro si dhe në bazë të LZP-së mund të dënohen deri në 50,000.00 euro””, ka thënë Desku.

Gjoba për shkelje në fushatë i janë shqiptuar Partisë Demokratike të Kosovës, Aleancës Kosova e Re, lëvizjes ‘Vetëvendosje’, Alternativës, etj.

Dënime do të paguajnë edhe kandidatët e këtyre partive për kryetarë komunash si: Lirak Çelaj (PDK) 3500 euro, Shpend Ahmeti (LVV) 2000 euro, Mimoza Kusari (Alternativa) 3500 euro.

Kandidatët tjerë ndaj të cilëve ka pasur ankesa dhe janë shqiptuar gjoba nga PZAP-i janë:

Selim Pacolli, kandidat i AKR-së për kryetar të Komunës së Prishtinës, Imri Ahmeti, kandidat i LDK-së për kryetar të Komunës së Lipjanit, Burim Berisha, kandidat i LDK-së për kryetar të Komunës së Fushë Kosovës; Agim Bahtiri, kandidat i AKR-së për kryetar të Komunës së Mitrovicës; Muharrem Sfarqa, kandidat i LDK-së për kryetar të Komunës së Ferizajt dhe Agim Veliu, kandidat i LDK-së për kryetar të Komunës së Podujevës.

 

 

 

 

 

 

 

 

 

 

 

 

 

 

---