119 të vdekur e 5816 të lënduar nga aksidentet në Kosovë

Ilustrim

Aksidentet e shumta me fatalitet në Kosovë kanë krijuar një gjendje të jashtëzakonshme në komunikacionin rrugor, thonë autoritetet e rendit.

Nga numri i madh i aksidenteve gjatë periudhës janar-nëntor, 119 veta kanë humbur jetën si pasojë e tyre.

Këto shifra shënojnë rritje mbi 22 për qind, krahasuar me periudhën e njëjtë të vitit të kaluar.

Kështu kanë thënë autoritetet e rendit, sipas të cilëve 5816 persona kanë pësuar lëndime trupore në aksidente komunikacioni, raporton “Radio Evropa e Lirë”.

Sipas Policisë, aktualisht është duke u zbatuar masa zero-tolerancë ndaj të gjithë kundërvajtësve në trafik, përcjell albinfo.ch.

Ndryshe, gjatë këtij viti janë shqiptuar 371.976 tiketa për ngasësit e automjeteve.

Në anën tjetër, në Klinikën Emergjente në Qendrën Klinike Universitare të Kosovës, kanë vdekur 21 persona të aksidentuar, përkundër angazhimit të gjithë stafit për të shpëtuar jetët e tyre.

Ekspertët e komunikacionit e vlerësojnë gjithë situatën si mjaft shqetësuese, ku sipas tyre ndër arsyet e shtimit të numrit të aksidenteve ka qenë edhe shtimi i numrit të automjeteve në komunikacion.

Ndryshe, ligji i ri për trafikun rrugor që nga viti i kaluar ka hyrë në fuqi, derisa zyrtarë të kësaj fushe kanë deklaruar se përveç shqiptimit të pikëve negative, dënimet për shkelësit e rregullave të trafikut do të jenë nga 300 deri në 900 euro, dhe në raste të caktuara edhe me marrjen e patentë shoferit.