12 milionë euro për romët e Ballkanit dhe program për kosovarët që kthehen

Të dyja këto programe janë menduar si masa për t`i dalë në rrugë fluksit të madh të migrantëve nga Ballkani drejt Gjermanisë

Ministria për Zhvillim e Qeverisë Federale të Gjermanisë ka vendosur të japë 12 milionë euro për përmirësimin e gjendjes së romëve në Ballkanin Perëndimor. Njëkohësisht është në përgatitje e sipër edhe një program për trajtimin e refugjatëve të kthyer kosovarë, shkruan focus.de.

Të dyja këto programe janë menduar si masa për t`i dalë në rrugë fluksit të madh të migrantëve nga Ballkani drejt Gjermanisë, transmeton albinfo.ch.
Ndonëse romët në vendet ku jetojnë në Ballkan nuk janë të përndjekur, ata shpeshherë janë të diskriminuar, thekson ministri i zhvillimit, Gerd Müller.

Ai këtë e dokumenton duke thënë se “ai që nuk jeton në një shtëpi me kushte të denja për njeriun, nuk ka sigurim shëndetësor dhe as punë të paguar, e merr rrugën në sy. Por ne dua që njerëzit nga Ballkani të kenë një perspektivë në vendet e tyre”.
Në gjysmën e parë të vitit 2015 në Gjermani kanë kërkuar azil rreth 25.000 romë, transmeton albinfo.ch. Ky numër është afërsisht sa një e treta e numrit të përgjithshëm të azilkërkuesve nga i gjithë Ballkani.
Programi për mbështetjen e kthimit në Kosovë ndërkaq ka në fokus të tij promovimin e arsimit dhe punësimit, thuhet në focus.de, ku nuk jepen të dhëna më të detajuara lidhur me këtë çështje.