16 vjet burg kosovarit për vrasjen e 17 vjeçares

Me këtë vendim, Gjykata e Lartë ka shkuar më larg se ajo qarkut, e cila e kishte dënuar kosovarin me 13.5 vjet burg për vrasje me paramendim

Është cilësuar nga prokuroria si ekzekutim i kryer me gjakftohtësi, vrasja që më 7 mars të vitit 2009 e kishte kryer shqiptari sot 24 vjeçar, duke e qëlluar me dy plumba në kokë nga afërsia të dashurën e tij 17 vjeçe. Kështu, Gjykata e Lartë e Cyrihut i ka shqiptuar të mërkurën dorasit një dënim prej 16 vitesh heqje lirie për veprën penale vrasje të rëndë.

Me këtë vendim, Gjykata e Lartë ka shkuar më larg se ajo qarkut, e cila e kishte dënuar kosovarin me 13.5 vjet burg për vrasje me paramendim. Në këtë mënyrë është realizuar qëllimi i prokurorit për kualifikimin e veprës si vrasje e rëndë. Ai e ka përshkruar vrasjen si një veprim të rëndë dhe pa asnjë motiv mbi vajzën e pambrojtur. Duke treguar një mungesë vlerësimi të jetës së tjetrit, ai ka ekzekutuar të dashurën e tij duke e qëlluar atë drejtpërdrejtë në kokë. Edhe zvarritja e dërgimit në spital të vajzës së plagosur, tregon, sipas padisë, mungesën e ndjenjave njerëzore te vrasësi.

Trupi gjykues i ka shqiptuar atij po ashtu edhe masën e trajtimit psikiatrik ambulator, masë që nuk e shtyn zbatimin e dënimit me burg.

Nga ana tjetër, avokati i dorasit ka folur për një aksident dhe ka kërkuar dënim për vrasje nga pakujdesia. Sipas tij, në këtë rast nuk është arritur të dëshmohet qëllimi për vrasje. I mbrojturi i tij ka bërë një marrëzi, por vrasja nuk ka qenë qëllimi i tij. Ai ka menduar se revolja nuk kishte plumba brenda.

Ndërsa avokati i prindërve të viktimës ka kërkuar që të sqarohet përfundimisht shkaku i vdekjes së bijës së tyre. Ata nuk duan hakmarrje por duan vetëm zbardhjen e krimit.