18 vjet burg kosovarit për vrasjen e truprojës

Pasi i del befasisht përpara roja e securitasit , një burrë 57 vjeç, kosovari e qëllon atë në qafë, duke i shkaktuar vdekjen e menjëhershme

Në dhjetor të vitit 1999, kosovari që sot ka 45 vjet kishte sulmuar bashkë me një person tjetër qendrën e bilardos Littke Reno në Langenthal të Bernës. Marrja e plaçkës kishte dështuar pasi që ata nuk kshin mundur të hapnin trezorin, i cili ishte i bllokuar nga punëtorët. Por, pasi atyre u del befasisht përpara roja e securitasit , një burrë 57 vjeç, kosovari e qëllon atë në qafë, duke i shkaktuar vdekjen e menjëhershme.

Sot 45 vjeçari kishte ikur nga vendi i ngjarjes dhe kishte mundur të fshihej ploit 9 vjet, ndërkohë që bashkëfajtori konsiderohet ende i arratisur.

Në vitin 2010 Gjykata e Qarkut e dënoi atë me 15 vjet burg. Ai e ka atakuar këtë vendim në Gjykatën e Lartë, e cila vetëm sa ia kishte rritur masën e dënimit në 18 vjet burg. Së fundi, kosovari e kishte shtyrë më tutje lëndën në shkallën më të lartë të gjyqësisë zvicerane, në Gjykatën Federale. Kjo e fundit e ka vërtetuar të premten dënimin e Gjykatës së Lartë, kështu që dënimi me 18 vjet burg mbetet valid dhe përfundimtar.

Në ankesën e bërë lidhur me dënimin nga Gjykata e Lartë, kosovari ka thënë veç tjerash se gjykata në fjalë e ka trajtuar në mënyrë jo të drejtë lëndën e tij dhe ka shkelur “prezumimin e pafajësisë”. Sipas versionit të tij, pak para të shtënave ka pasur një përleshje. Pasi atë e kishin shtyrë, kishte kërcitur arma. Ai madje as nuk e ka ditur se revolja kishte qenë e mbushur.

Ndërkaq Gjykata e Lartë kishte menduar ndryshe. Sipas saj, kosovari e ka vrarë rojen nga afërsia prej 110 deri 140 cm duke e qëlluar pikërisht në qafë dhe para kësaj nuk ka pasur kurrfarë përleshjeje. Ndërsa Gjykata Federale në vendimin e saj thotë se gjykata e lartë e ka parë si të dëshmuar një zhvillim të atillë të ngjarjes.

Po kështu instanca më e lartë ka shtuar në vendimin e saj se dorasi, duke qenë një, siç e përshkruan  “ish ushtar çlirimtar i UÇK-së kosovare është vështirë të besohet se që ai të mos e ketë ditur se arma ka qenë e mbushur”.

Gjykata Federale ka kundështuar edhe pjesën e ankesës për masën e dënimit. Sepse, i dënuari kishte kërkuar të mos dënohej për vrasje të rëndë por për vrasje nga pakujdesia, me 8 vjet burg. Ndërkaq gykata është përgjigjur se kjo vepër kategorizohet si “vrasje e rëndë” për shkak se ka qenë “veçanërisht e paskrupullt” dhe, vrasja e njeriut me qëllim grabitjen “është një rast tipik i vrasjes së rëndë”.