Punime në rrugën drejt Aeroportit të Prishtinës, paralajmërohen vonesa në qarkullim

Vonesa në rrugën drejt Aeroportit të Prishtinës, udhëtarëve u bëhet thirrje të nisen më herët

Udhëtarët që gjatë së mërkurës dhe së enjtes do të udhëtojnë drejt Aeroportit Ndërkombëtar të Prishtinës “Adem Jashari” duhet të llogarisin në vonesa të mundshme në qarkullim për shkak të punimeve infrastrukturore, transmeton albinfo.ch.

Sipas njoftimit të aeroportit, punimet po zhvillohen në pjesën e rrugës nga rrethi i Sllatinës, ku qarkullimi i automjeteve pritet të jetë më i ngadalësuar.

Për të lehtësuar lëvizjen dhe për të shmangur bllokimet, është hapur një rrugë ndihmëse anësore, e cila mund të përdoret për qarkullim në drejtim të aeroportit, si dhe në kthim.

Aeroporti u ka bërë thirrje udhëtarëve që të planifikojnë nisjen më herët, në mënyrë që të shmangin vonesat e mundshme dhe të kenë kohë të mjaftueshme për të arritur në aeroport para fluturimit.

Po ashtu, udhëtarëve u është rekomanduar që, sipas mundësive, të përdorin rrugët alternative dhe të ndjekin sinjalistikën rrugore, si dhe skemën udhëzuese të vendosur për orientimin e qarkullimit./Albinfo.ch

---