199.824 vota nga Diaspora, vazhdon numrimi

Në një deklaratë për media, kryetari i Komisionit Qendror të Zgjedhjeve, Ilirjan Celibashi, në një deklaratë për mediat nga Parku Olimpik, bëri me dije se procesi i numërimit të votave nga diaspora vijon me intensitet, ndërsa ka ende një pjesë të konsiderueshme për t’u përfunduar, përcjell albinfo.ch.

Sipas tij, kanë mbetur për numërim edhe 50 mijë fletë votimi dhe rreth 400 kuti. Deri tani, kompania postare DHL ka dorëzuar mbi 201 mijë zarfe, prej të cilave 199.824 fletë votimi janë konsideruar të vlefshme, ndërsa 1.971 janë shpallur të pavlefshme.

Celibashi sqaroi gjithashtu se 353 shtetas kanë kthyer mbrapsht zarfin, por jo nëpërmjet DHL-së. Nga këto, 107 janë shqyrtuar nga KQZ-ja për vlerësim. Deri më tani, janë vlerësuar gjithsej 202.063 materiale të ardhura nga jashtë vendit.

Aktualisht, po vlerësohen votat për kandidatët individualë, një proces që do të jetë vendimtar për rezultatin përfundimtar të zgjedhjeve në listat e hapura.

“Janë dhe 50 mijë vota për t’u numëruar. Kanë mbetur edhe 400 kuti për t’u numëruar. Mbi 201 mijë zarfe me fletën e votimit na ka dorëzuar DHL. Zgjedhës që e kanë kthyer mbrapsht zarfin janë 353,” tha Celibashi