Mungesa e punëtorëve në Zvicër, kompanitë po rrisin mbështetjen për kujdesin ndaj fëmijëve

Mungesa e fuqisë punëtore të kualifikuar në Zvicër po i shtyn gjithnjë e më shumë ndërmarrjet e vogla dhe të mesme të merren me çështjen e kujdesit për fëmijët.

Sipas një studimi të institutit kërkimor Sotomo, rreth gjysma e ndërmarrjeve të vogla dhe të mesme do të ishin të gatshme të kontribuonin financiarisht për shpenzimet e çerdheve, nëse do të kishin mbështetje përmes lehtësimeve tatimore apo formave të tjera të kompensimit.

Në Zvicër, një familje me dy prindër që punojnë me kohë të plotë dhe me një fëmijë shpenzon mesatarisht më shumë se një të katërtën e të ardhurave të saj për kujdesin ndaj fëmijës. Kostot e larta bëjnë që veçanërisht gratë të reduktojnë orarin e punës ose të largohen përkohësisht nga tregu i punës.

Sipas studimit, kompanitë po përballen me mungesa të stafit, ulje të orarit të punës dhe vështirësi në planifikimin e personelit për shkak të përgjegjësive familjare të punonjësve.

Platforma zvicerane Awina, e cila lidh prindërit me çerdhet, ka rreth 720 nga afërsisht 3800 çerdhe të regjistruara në platformën e saj. Kompania synon të thjeshtojë procesin e gjetjes së kujdesit për fëmijët dhe të ndihmojë bizneset të ofrojnë zgjidhje më të përshtatshme për punonjësit.

Ekspertët theksojnë se mbështetja për familjet mund të jetë një avantazh konkurrues për kompanitë në luftën për punëtorë të kualifikuar. Megjithatë, ata paralajmërojnë se përmirësimi i kujdesit për fëmijët nuk do t’i eliminojë të gjitha mungesat në punë, pasi fëmijët e sëmurë, për shembull, duhet të qëndrojnë në shtëpi.

Për kompanitë, kujdesi për fëmijët po shihet gjithnjë e më shumë jo vetëm si çështje sociale, por edhe si një instrument për të tërhequr dhe mbajtur punëtorë të kualifikuar/albinfo.ch/