Zvicër: Reforma e re shëndetësore shqetëson mjekët

(KEYSTONE/Christian Beutler)

Mjekët në Zvicër kanë shprehur shqetësim për një reformë të re që parashikon vendosjen e një kufiri ditor për shërbimet që mund të faturohen në kuadër të sigurimit të detyrueshëm shëndetësor.

Sipas projektit, nga fillimi i vitit 2027 çdo mjek do të mund të faturojë deri në 1.577 pikë tarifore në ditë, ose rreth 12 orë pune. Masa synon të ulë kostot e sistemit shëndetësor dhe të parandalojë faturimet e tepërta.

Komuniteti mjekësor kundërshton reformën, duke paralajmëruar se ajo mund të kufizojë qasjen e pacientëve në kujdes shëndetësor, të zgjasë listat e pritjes dhe të ndikojë në vendimmarrjen mjekësore. Një peticion kundër kësaj mase ka mbledhur tashmë rreth 30 mijë nënshkrime, kryesisht nga mjekë.

Nga ana tjetër, përfaqësuesit e sigurimeve shëndetësore thonë se kufiri është vendosur në një nivel që nuk pritet të krijojë probleme në shumicën e rasteve dhe se, nëse paraqiten vështirësi, rregullat mund të rishikohen.

Vendimi përfundimtar për zbatimin e reformës pritet të merret nga Këshilli Federal i Zvicrës.