20 milionë euro për viza

Aleanca Kosovare e Bizneseve (AKB) ka folur për sfidat dhe zhvillimin ekonomik të Kosovës gjatë vitit 2017, në një konferencë përmbyllëse.

Agim Shahini, kryetar i AKB-së, tha se 2017 ishte vit i kthesave politike, por jo edhe atyre ekonomike.

Si ndër sukseset kryesore përmendi masat e reja fiskale që do hynë në funksion nga një janari dhe nënshkrimi i marrëveshjes për ndërtimin e termocentralit nga kompania amerikane në vlerë 1.3 miliardë euro, përcjell albinfo.ch.

Shahini, tha se liberalizimi i vizave nuk ndodhi dhe si rezultat i saj kosovarët u detyruan të marrin mbi 8 mijë e 500 viza pune iu lëshuan nga ambasadat e ndryshme. Për këto viza afariste, turistike, sportive e familjare u shpenzuan mbi 20 milionë euro.

Sipas kreut të AKB-së, zgjedhjet qendrore dhe lokale patën efekte negative në ekonomi, ku vetëm tre muajt e fundit qeveria vendosi të merret me procese ekonomike dhe heq të gjitha taksat për teknologji dhe lëndë të parë nga 1 janari 2018.

Ai shtoi se po ashtu Ushtria e Kosovës nuk u themelua e as Asociacioni i Komunave Serbe, që për AKB-në janë të lidhura në mënyrë tërthorazi.

Integrimi dhe njohjet e Kosovës sipas kryetarit të AKB-së kanë stagnuar në vitin 2017.

Shahini shtoi se prodhimi vendor nuk arriti ta zëvendësojë importin i cili u rrit edhe në vitin 2017. Deficitet tregtare mbeten të larta në raport 88 % – 12% të eksportit.

Sektori më profitabil në Kosovë ishte ai financiar i patundshmërisë dhe ai i ndërtimit.