20 shqiptarë kthehen nga Izraeli

Ministria për Evropë dhe Punë të Jashtme e Shqipërisë ka njoftuar se 20 shqiptarë janë larguar nga Izraeli, përcjell albinfo.ch.

Ata kanë udhëtuar nga Izraeli në Greqi e më pas janë nisur për në Shqipëri, të cilët jetojnë në Tiranë, Korçë dhe Vlorë.

“20 shtetas shqiptarë kanë udhëtuar mëngjesin e sotëm nga Izraeli për në Greqi, përmes një fluturimi të linjave ajrore greke, të koordinuar nga Ministria për Evropën dhe Punët e Jashtme. 17 prej tyre pasi kanë mbërritur në Athinë, janë nisur drejt Shqipërisë në rrugë tokësore dhe po transportohen për në qytetet ku ata jetojnë dhe banojnë, si: Tirana, Gjirokastra, Korça dhe Vlora, nën kujdesin e MEPJ.”

MEPJ ka njoftuar se janë në kontakt të vazhdueshëm me të gjitha ambasadat dhe me ministritë e vendeve të tjera të rajonit për t’u ardhur në ndihmë të gjithë qytetarëve që kërkojnë të kthehen në vendet e tyre.