2016, viti i arit

Informacionet e këqija që vijnë nga Kina dhe një rënie në çmimet e naftës kanë kthyer epitetin e arit për investime të sigurta në kohë të pasigurta. Pas tre vjet humbjesh, ari nga fillimi i vitit është forcuar më shumë se tetë për qind, duke u bërë investimi më i mirë këtë vit në nivel global.

Gjatë javës së kaluar një ons ari ka arritur një çmim prej 1.155, 30 dollarë, niveli më i lartë që nga 29 tetori, dhe analistët parashikojnë se do të jetë edhe më mirë.

“Analistët parashikojnë se 2016-a do të jetë një vit i artë. Ka shumë elemente që shkaktojnë jostabilitet në tregjet dhe ari është streha më e sigurt për ta. Vlerësimet tregojnë se paqëndrueshmëria në tregje do të shtojë oreksin e investitorëve për arin, kështu që çmimi i tij gjatë këtij viti mund të arrijë 1,350 dollarë”, thotë analisti Aslam nga „AVA Trade“.

“Personalisht kam pritur çmime pak më të ulëta gjatë tremujorit të parë, por çmimet e ulëta të naftës dhe rendimentet e ulëta nga letrat me vlerë kanë rritur çmimet e arit më herët se sa pritej”, shtoi kolegu i tij, Ole Hansen.