26 vjet nga masakra në Burgun e Dubravës

Sot, më 19 maj, shënohet përvjetori i Masakrës së Dubravës, një prej krimeve më të rënda të kryera kundër shqiptarëve gjatë luftës në Kosovë. Më 19 maj të vitit 1999, regjimi serb kreu një masakër të përgjakshme brenda burgut të Dubravës, ku u vranë 160 të burgosur shqiptarë dhe u plagosën mbi 300 të tjerë.

Kjo masakër u zhvillua për pesë ditë me radhë, nga 19 deri më 24 maj, duke u shndërruar në një simbol të dhunës sistematike që Serbia ushtronte ndaj popullsisë shqiptare. Viktimat ishin kryesisht të burgosur politikë, të cilët, në vend se të gjenin mbrojtje brenda mureve të burgut, u përballën me një ekzekutim masiv, transmeton albinfo.ch.

Përkundër dëshmive të shumta nga të mbijetuarit, që rrëfyen për tmerrin dhe egërsinë e sulmit, ende nuk ka pasur drejtësi për këtë krim. Deri më sot, asnjë person nuk është dënuar për këtë masakër. Aktualisht, është duke u zhvilluar një proces gjyqësor ndaj Gavrilo Milosavleviqit, një ish-gardian i burgut, i cili dyshohet për përfshirje në vrasjet masive gjatë asaj kohe.

Masakra e Dubravës mbetet një plagë e hapur në kujtesën kolektive të Kosovës dhe një dëshmi e qartë e nevojës për drejtësi dhe përgjegjësi ndërkombëtare për krimet e luftës, transmeton albinfo.ch.