27-vjeçari shqiptar ndalohet në aeroportin e Memmingenit me dokumente të falsifikuara

I riu nga Shqipëria dyshohet se tentoi të udhëtonte drejt Dublinit me një pasaportë belge të falsifikuar, ndërsa gjatë kontrollit iu gjetën edhe dy patenta të falsifikuara.

Një 27-vjeçar nga Shqipëria është ndaluar në Aeroportin e Memmingenit në Gjermani, pasi dyshohet se kishte tentuar të udhëtonte drejt Dublinit me dokumente të falsifikuara, transmeton albinfo.ch.

Rasti është regjistruar të dielën, më 27 shtator 2026, gjatë kontrollit të pasagjerëve për një fluturim drejt Irlandës.

Sipas policisë kufitare, 27-vjeçari fillimisht i kishte paraqitur stafit të hipjes në bord një pasaportë belge të falsifikuar. Kur u mor në pyetje lidhur me dokumentin, ai dyshohet se u fsheh në një tualet në zonën e nisjeve, por më vonë u gjet nga policia.

Gjatë kontrollit, zyrtarët i gjetën edhe një patentë shoferi rumune të falsifikuar dhe një patentë shoferi belge, po ashtu të falsifikuar.

Në posedim të tij u gjetën edhe dokumentet e tij origjinale shqiptare.

Policia i ka caktuar 27-vjeçarit një afat për t’u larguar nga zona Schengen. Ndaj tij kanë nisur hetimet nën dyshimin për falsifikim dokumentesh dhe sigurim të dokumenteve zyrtare të falsifikuara./Albinfo.ch

---