3 vjet burgim për Xhabir Zharkun

Zharku është shpallur fajtor për pikën 1 të aktakuzës, e që ka të bëjë me veprën penale të detyrimit apo zhvatjes

Me 3 vjet burgim është dënuar kryetari i Kaçanikut, Xhabir Zharku. Pos kësaj, Gjykata e Qarkut në Prishtinë atij i　ka caktuar edhe një dënim prej 1 mijë e 500 euro për armëmbajtje pa leje.

Zharku është shpallur fajtor për pikën 1 të aktakuzës, e që ka të bëjë me veprën penale të detyrimit apo zhvatjes. Ndërsa është shpallur i pafajshëm për veprën penale të kërcënimit.

Po të njëjtin dënim ka marrë edhe Arsim Kolshi, pjesë e të akuzuarve, ndërsa Besnik Hasani e Nysret Cena janë dënuar me nga një vit e dy muaj burgim. Trupi gjykues ka vendosur që tre nga të dënuarit nuk do të vuajnë dënimin deri sa vendimi të bëhet i plotfuqishëm, ndërsa njëri nga ta, Besnik Hasani, ndodhet në burg.

Krejt ky gjykim sipas Zharkut po bëhet për përfitime politike. “Unë edhe më herët UNMIK-un e kam quajtur UNMIKISTAN, vazhdimisht e kam kritikuar për punën këtu. Ky gjykim është nisur për përfitime politike. Por nuk i frikësohem burgut”, ka thënë Zharku.

Avokatët e të gjithë të akuzuarve kanë paralajmëruar ankesë ndaj aktvendimit të Gjykatës.