5 milionë franga si “ndihmë e shpejtë” për fshatin Bondo

55 ekonomive familjare të këtij fshati u janë ndarë nga 2.000 deri në 10.000 franga. Ndërkaq pjesa kryesore e ndihmave të dhuruara prej 5 milionë frangave do të rrjedhë gjatë viteve në vijim

Keystone

Organizata humanitare zvicerane “Glückskette” ka grumbulluar 5 milionë franga si ndihmë e parë për banorët e fshatit Bondo, të goditur nga rrëshqitjet e dheut. Organizatorët thonë se aksioni për ndihmën e menjëhershme tashmë është përmbyllur.

55 ekonomive familjare të këtij fshati u janë ndarë nga 2.000 deri në 10.000 franga. Ndërkaq pjesa kryesore e ndihmave të dhuruara prej 5 milionë frangave do të rrjedhë gjatë viteve në vijim pë të mbuluar shpenzimet që do të mbeten pa u mbuluar pas rindërtimit të shtëpive dhe ndërtesave tjera të dëmtuara në fshat. 

Siç është shkruar gjerësisht edhe në albinfo.ch, më 23 gusht ka pasur një rrëshqitje të madhe shkëmbinjsh nga maja Piz Cengalo, mbi fshatin Bondo. Me atë rast kishin rënë rreth 3 milionë metra kubikë masë shkëmbi e dheu. Ajo masë qe grumbulluar në një luginë, ku, duke u përzier me ujë kishte vërshuar deri në fshatin Bondo. Rrëshqitje të tjera shkëmbi e dheu janë regjistruar edhe më vonë në këtë regjion.