6 të vdekur në aksidentin e shkaktuar nga shoferi i dehur në Tirolin Jugor

Viktimat janë shtetas gjermanë, të rinj, të moshave 20 deri 25 vjeçare, të cilët, pas një mbrëmjeje të kaluar në një lokal, po prisnin pranë një autobusi

Në orët e vona të natës së mbrëmshme në Tirolin e Jugut, Itali, një makinë është përplasur në një grup njerëzish dhe ka lënduar për vdekje gjashtë persona.

Sipas policisë, viktimat janë shtetas gjermanë, të rinj, të moshave 20 deri 25-vjeçare, të cilët, pas një mbrëmjeje të kaluar në një lokal, po prisnin pranë një autobusi, shkruan srf.ch.

Transmetuesi Rai Südtirol ka raportuar se automjeti kishte goditur një grup prej 17 personash në Luttach në Ahrntal, transmeton albinfo.ch. Një numër syresh u lënduan, disa prej të cilëve morën lëndime të rënda.

Gjashtë personat kanë vdekur në vendin e aksidentit. Sipas njoftimeve të mediave, shoferi ishte një burrë 28-vjeçar, i cili ishte në gjendje të dehur, i cili pastaj është arrestuar. Tek ai u konstatua 1.95 promilë alkool në gjak.

Zona ku ndodhi aksidenti i rëndë ndodhet në Itali, në kufirin me Austrinë dhe njihet si zonë sportive dimërore, shkruan albinfo.ch. Më saktësisht, vendi i aksidentit është afër qytetit Bruneck.

---