6 të vrarë në një sulm me armë në Angli, një fëmijë në mesin e viktimave

Sfondi i aktit të përgjakshëm është ende i paqartë por autoritetet kanë përjashtuar motivin terrorist

Gjashtë persona janë vrarë në mbrëmjen e të enjtes nga të shtënat në qytetin jugperëndimor anglez, Plymouth, përfshirë sulmuesin e dyshuar.

Sipas policisë, një nga viktimat ishte fëmijë nën moshën 10 vjeç, shkruan euronews.

Incidenti ka ndodhur në një zonë banimi, dëshmitarët okularë raportojnë se sulmuesi ka goditur derën e një shtëpie dhe ka filluar të qëllojë, transmeton albinfo.ch. Një numër i madh i policisë dhe punonjësve të shpëtimit ishin në detyrë.

Sfondi i aktit të përgjakshëm është ende i paqartë por autoritetet kanë përjashtuar motivin terrorist. Policia u ka kërkuar njerëzve që kishin bërë filmime me celularë, të mos i postonin ato në internet.

Ministrja e brendshme Priti Patel e ka përshkruar incidentin si “tronditës” dhe ka thënë se mendimet e saj ishin me të prekurit. Keir Starmer, udhëheqës i Partisë Laburiste, ka folur për një tragjedi.

Plymouth është selia e bazës më të madhe detare në Evropën Perëndimore, e cila gjithashtu përfshin nëndetëse bërthamore dhe anije të mëdha luftarake.

---