11 mijë e 551 aksidente trafiku kanë ndodhur në Kosovë gjatë periudhës janar-korrik të këtij viti. Si pasojë e këtyre aksidenteve, 63 persona kanë vdekur.
Për dallim prej vitit 2022 në periudhën e njëjtë të vitit 2021 janë shënuar më pak aksidente trafiku, por më i madh ka qenë numri i të vdekurve, raporton Express, përcjell Albinfo.ch.
Për parandalimin e aksidenteve, Policia e Kosovës ka shqiptuar gjoba.
Sipas Policisë, gjatë periudhës kohore janar-korrik në vitin 2022 janë shqiptuar 379 mijë e 884 gjoba.
“Përveç aktiviteteve policore në këtë aspekt, Policia e Kosovës apelon tek të gjithë pjesëmarrësit në trafik që të kenë kujdes më të shtuar, të respektojnë rregullat dhe shenjat e trafikut rrugor si dhe t’iu përshtaten kushteve të rrugës dhe atyre atmosferike, për të pasur një siguri më të madhe në trafik”, thuhet në përgjigjen e Policisë së Kosovës./Albinfo.ch